【啟德遊藝嘉年華】免費任玩任食｜親子好去處｜香港玩樂｜開團

2020年開始，想去吓戶外活動又想做吓文青嘅你，千祈唔好錯過嚟緊1月19日喺啟德跑道公園舉行，由九龍城民政事務處主辦、九龍城區議會贊助嘅「啟德遊藝嘉年華」呀！

活動內容非常豐富，小朋友唔洗擔心冇野玩，同智樂合辦嘅「兒童遊戲區」就啱晒活潑又好動嘅你地喇！

遊戲包括：百變木框、水泡相撲、小小工程師等等兒童遊戲等緊你嚟挑戰！

同場仲有多個攤位遊戲，實唔會悶親大家！

當日將會舉行7個特色工藝坊，包括印度曼陀羅彩點藝術杯墊、紙摺舞獅獅頭、廣彩瓷畫、迷你大頭佛同埋民族藍染布袋等，一齊嚟發揮你地嘅小宇宙，製作屬於自己嘅作品啦！

而喺草地互動劇場為大朋友同小朋友同樣準備咗唔同類型嘅節目，包括環保樂器音樂互動、互動魔術、布偶劇場及繪本音樂會，鍾意欣賞表演嘅你，就一定唔可以錯過啦！

係咪覺得差咁啲野？今次嘉年華仲為大家提供草地繪本館同美食攤位等，有得食之餘仲有得玩！全部都係免費㗎！

免費接駁巴士

活動當日早上11時30分開始，以下5個地點有免費接駁巴士來往啟德跑道公園，每隔約30分鐘一班，實際時間視乎交通情況。

⭐ 九龍塘多福道 (近耀中國際學校(中學部))
⭐ 何文田忠孝街 (近愛民邨昭民樓)
⭐ 啟德沐虹街 (近聖公會聖十架小學)
⭐ 土瓜灣炮仗街 (近聖公會牧愛小學)
⭐ 紅磡差館里 (近家維邨家榮樓)

有興趣嚟「啟德遊藝嘉年華」嘅大小朋友，約定你1月19日見！

【啟德遊藝嘉年華】

日期： 2020年1月19日（星期日）
時間： 下午12時至5時30分
地點： 啟德跑道公園
費用： 免費入場

資料來源：九龍城民政事務處、Playright Children’s Play Association