【日本】空氣懸浮觸控螢幕自助收銀！疫情下減少接觸！｜網絡熱話｜放假去邊

日本7-ELEVEN喺2022年2月開始，喺東京6家店舖推出「空中懸浮觸控螢幕」POS收銀機（空中ディスプレイPOS）服務，因應疫情下，大幅增加非接觸式服務嘅需求，有望減少員工嘅工作量！

科技日新月異嘅時代，科幻電影中嘅未來場景，已經嚟到眼前！由日本7-ELEVEN、Asukanet（アスカネット）、神田工業、TOSHIBA、三井化學以及三井物産プラスチック共6家公司，合作開展嘅空中懸浮觸控螢幕收銀機實驗，已喺東京6家7-11分店登場，市民可以藉由觸碰浮在空中嘅收銀畫面，完成自助結帳。

而呢項實驗，除咗係為消費者帶來嶄新購物體驗外，亦希望透過減少收銀台空間，創造更多嘅銷售空間同機會，同時加強喺疫情之下嘅非接觸式服務。日本7-ELEVEN指出，空中懸浮觸控螢幕技術多運用於酒店等櫃檯等地方，係全球首度用於POS收銀機上。

呢款空中懸浮「收銀機」大小約闊317.5 x 深600mm，比一般收銀機螢幕嘅尺寸再細一啲，使用方式都算係淺顯易懂，消費者先掃描商品嘅條碼，再喺懸浮於空中嘅螢幕上，按照指示、選取服務後，就可以利用信用卡或者電子支付完成結帳。購買煙酒商品、繳交水電費，或者使用寄件服務等，仍需要請店員協助。不過都可達到減少員工工作量嘅效果。