【澳門兩日一夜】懶人包~~ 必食必玩! 必睇煙花!｜澳門旅遊｜放假去邊

喺香港玩到悶？不如去澳門玩返兩日一夜？！
又有得食，又有得影相，仲有期間限定煙花匯演！
是時候食盡澳門，坐喺海邊欣賞煙花喇～

===============

第二十九屆澳門國際煙花比賽匯演！9、10月必睇！

澳門一年一度嘅「第二十九屆澳門國際煙花比賽匯演」開始咗喇！
喺旅遊塔地下嘅餐廳欣賞煙花，絕對係最佳位置！勁好feel、勁近啊！

今年嘅比賽會喺9月1日、8日、15日、24日及10月1日 (晚上9點、9點40分) 喺澳門旅遊塔對出海面進行！
參賽嘅10組隊伍來自世界各地！唔同日子過嚟，可以欣賞到唔同隊伍嘅演出！

參賽隊伍會以煙花配合音樂、光影演出！
超靚、超好氣氛，場場都好精彩～～

喺旅遊塔隔離，仲有火樹銀花嘉年華！
有勁多美食，又有表演睇，仲有遊戲玩！點可以唔去？！

澳門點止咁少嘢玩？！
拉落去！「澳門兩日一夜懶人包」馬上送到！

===============

(Day1) 第一站：葡多利

到咗澳門，第一時間梗係醫肚！
呢間葡國菜係小編心頭好～～～

必食海鮮拼盤！有齊青口、鮮蝦、虎蝦、焗蟹肉餅、帶子、蜆！

葡式招牌牛扒都係必食之選！
嫩滑嘅厚切牛扒，加埋特製牛油醬汁，一試難忘啊～～～

(Day1) 第二站：戀愛電影館

呢到簡直係文青必到！
有得了解澳門電影史之餘，重點係影相！

淨係粉紅色/黃色嘅外牆已經好靚喇～～～

戲院入面嘅座位都係打卡位！五顏六色，好搶眼好特別！

(Day1) 第三站：馬慶康

影完相，又係時候食個Tea！
小編極度推介呢間餐廳嘅華田厚西多！

超多華田脆脆、牛油、煉奶，切開仲有流心芝士！
點可以唔試呀？！

想做大胃王，挑戰食碟飯落肚？！
呢到嘅太陽蛋叉燒飯就啱晒你！

蛋黃蛋汁，配埋秘製豉油，撈飯食簡直一流！

(Day1) 重頭戲！第四站：澳門旅遊塔

食葡國菜自助餐，爽！
坐喺海邊食，更爽！
一邊食一邊睇煙花，超級爽呀！

睇煙花嘅同時，又點少得食高質素嘅葡國菜buffet呢？！
小編推薦：即烤葡式乳豬、啖啖肉開邊龍蝦、芝士烤生蠔、葡撻！

睇煙花靚嘅地方，又點止一個？！

南灣．雅文湖畔、旅遊塔戶外廣場、主教山西望洋公園，睇煙花都好靚㗎！
去澳門絕對唔可以錯過呢個盛事啊！

===============

(Day2) 第一站：皇冠小館

第二日早餐，不能錯過嘅係… 澳門必食水蟹粥！
用咗成隻蟹去煲！粥底夠綿，仲食到啖啖蟹肉！

食飽飽就出發第二站喇～～～

(Day2) 第二站：俊秀園

影相打卡位送到～～～
呢到可以話係澳門嘅小文創區！

舊街活化後加入藝術元素，除咗有特別設計嘅街道，周圍仲掛滿燈籠！

牆身同埋地下都有色彩鮮豔嘅塗鴉，沿路仲有好多間文創店舖添啊～～～

(Day2) 第三站：牛記咖哩美食

嚟到澳門… 除了食，還是食！
小編今次帶你去食蟹黃撈麵！超級無敵多蟹膏～～～
雖然膽固醇超標，不過開心指數都超晒標啊！

(Day2) 第四站：康公夜市

食完嘢不如去行市集？！
康公夜市係期間限定，去到10月初就完～

入面有個手作小市集，女仔必定鍾意手繪耳環，好靚啊～～～～

行到肚餓？
呢到仲有好多攤檔，勁多款嘢食任你揀！

小編最鍾意蒜蓉燒海鮮！帶子、生蠔、蟶子、鮑魚，全部都有！
不過龍蝦才是小編心水推介～～～～～

台灣夜市必定會食到嘅雞翼包飯呢到一樣有，仲要係即燒！
隻隻都漲卜卜、勁足料！

康公夜市仲有好多款海鮮、小食、甜品！
等緊你嚟發掘啊～～～～

第二十九屆澳門國際煙花比賽匯演

日期：2018年9月1、8、15、24日及10月1日
時間：晚上9時正、9時40分
地點：澳門旅遊塔對出海面
詳情：fireworks.macaotourism.gov.mo

火樹銀花嘉年華

日期：2018年9月1、8、15、24日及10月1日
時間：下午5時至11時
地點：澳門旅遊塔旁

===============

放假去邊 更多好介紹:
快啲like我哋Facebook
同follow我哋Instagram啦!