【第七屆澳門國際旅遊 (產業) 博覽會】超大型博覽會必逛必玩攻略

一有長周末，就好想去澳門玩～話晒都有「UNESCO創意城市美食之都」之稱！呢幾日無咩做，想嚟個快閃，就千祈唔好錯過第七屆澳門國際旅遊 (產業) 博覽會啦！今年仲係歷年來最大規模，比起上年大一倍！立即睇吓呢幾個亮點啦！

===============

1. 文創館 文創工作坊

今年有一個開放式嘅文創館，大家可以報名參加 16 場唔同嘅文創工作坊，當中包括最近好流行嘅素食果凍雕花工作坊，又靚又超低卡路里，仲好好味！另外仲有保鮮花系列字母燈工作坊、環保飲品手提杯套工作坊、「與您遊世遺」世遺立體積木模型工作坊、DIY葡式瓷磚畫工作坊等，文青必去！每場文創工作坊都只係 MOP$50，抵到爛！名額有限，好多都full咗，你都有興趣，就立即去呢度登記啦：http://www.mitexpo.mo/plus/list.php?tid=188

文創館內有多款精美又有澳門特色嘅文創產品，各位文青記住去選購啦！

===============

2. 會場限定 世界各地旅遊優惠

會場內除咗有最新旅遊優惠及相關資訊，好似喺泰國館同日本館，仲可以搵到最新景點資訊情報！如果想知有咩會場限定優惠，記得要去現場睇吓啦！

===============

3. 考你運氣 三大抽獎切勿錯過

澳門旅遊局特設展區，可以參加幸運輪抽獎！只要根據現場指示掃QR Code，就可以參加幸運輪抽獎一次，每個鐘都有㗎！最想要嘅係限量紀念郵封！

只要喺場館中購買任何旅遊產品滿 MOP$300 ，並同《共慶回歸二十載 繽紛多彩澳門遊》特展合照，分享至社交平台，就可以得到一張精美嘅麥麥旅行卡啦！

 

另外，4月27同28號填寫入場券內嘅抽獎券，再放入抽獎箱 ，就有機會贏取機票、酒店住宿同數碼產品等等嘅獎品啦!

所有抽獎禮物都係先到先得，到時都係要參考場內海報呀！
===============

4.《共慶回歸二十載 繽紛多彩澳門遊》特展

今年係澳門回歸 20 周年，當日現場會有一個展示咗澳門特色嘅攤位，有齊澳門各個景點的展版，見證咗澳門回歸後發展20年嘅歷程，好有紀念價值！大家仲可以影相留念！
展區內仲有澳門旅遊吉祥物麥麥，快啲去捕捉佢啦！

===============

澳門國際旅遊 (產業) 博覽會

日期：2019/4/26-28

地點：澳門威尼斯人酒店金光會展中心 D-E館