大自然世界擁有住創作藝術所需嘅一切，只要懂得張開眼睛去觀察就會發現到！而藝術家Hamnah Bullen-Ryner憑住佢嘅眼力，以及對細節嘅敏銳，用樹枝、樹葉、花瓣同莓果創造咗好多令人讚嘆驚豔嘅動物肖像畫，雀仔定係動物都通通化為大地藝術！
Hamnah Bullen-Ryner本身係一位畫家同攝影師，作品有住一種繪畫嘅感覺，每個微小元素都似係筆觸一樣有層次。Bullen-Ryner同時仲係全職媽媽，當佢將創作目標轉向森林，就會感到安心忘卻咗湊小朋友嘅壓力。
佢每件嘅作品都使用當地當刻所搵到嘅材料，冇使用任何膠水或其他東西固定，所以佢嘅作品可能只能持續幾分鐘，然後就會隨風飄走，好多人都覺得可惜，但對Bullen-Ryner來講，短暫嘅性質反而有一種療癒感，可以令佢放低焦慮、恐懼同腦袋嘅混亂，將之轉變成美麗嘅事物，紀念大自然。影幾張相之後佢就會離開，將一切拋到腦後，反而令佢感到更平靜、更放鬆。
呢種類似「面對、接受、處理、放下」嘅創作理念，似乎都係忙碌現代人最好嘅心靈環保，我哋為大自然環保，大自然都為我地嘅心做環保。
