上郵輪嘆美食~ 隨食附送無敵大海景! | 郵輪假期 | 放假去邊

Nov 17, 2016 | Uncategorized

可以勁食好嘢已經係夠爽,
再望埋無敵大海景食,簡直就係終極大享受!

今次皇家加勒比嘅海洋贊禮號,有好多好嘢食,唔少餐廳、Cafe仲係免費!
所以話,只要你肯行去拎嘢食,包你飽到唔知肚餓為何物!
更加重要係!全部西餐廳都有中菜揀,就連Menu都會日日轉,食幾多次都唔怕悶啦~~

為食小編嘉儀率先介紹幾間免費餐廳畀大家,其他美食就等你哋去發掘喇!

特別鳴謝: 中旅社

小編:嘉儀(IG: chongkkayee)




1. 帆船自助餐廳

話到明係Buffet,梗係任揀任食㗎啦~

有齊沙律、涼拌小食、水果!
想食少啲?可以揀多款麵包,或者三文治。
想食飽飽?Pizza、粥粉麵飯任你拎!

一句講晒:呢到係全球美食館!

好彩嘅話仲可以望住個大海嘆Buffet~~

*早、午、晚餐時段開放時間長,自己去搵到位就有得食㗎喇!

2. The Grande 格藍迪

呢間餐廳匯集全球經典菜式~~
環境靚、嘢食正!主要提供西餐:烤雞、辣蕃茄鮮蝦意粉、威靈頓牛扒等等…
絕大部份主菜都係配薯蓉,超Creamy超好味㗎!

不過都有新斗記嘅中菜揀,仲要味道幾好!

魚柳小編最推介!魚肉又滑又香,好快就清晒~~

食完正餐,梗係要試埋甜品先走!

上:(左)焦糖布丁、(右)朱古力蛋糕
下:(左)紅莓拿破崙、(右)雪糕蛋糕

甜品都算唔錯,唯一美中不足嘅係紅莓拿破崙糖霜太甜。
最驚喜係雪糕蛋糕,每一啖都有冰火交融嘅感覺,好味道~~

*早、午餐有指定開放時間、晚餐就要根據船卡安排好的用餐時間(分別有5:30pm、8:00pm兩個時段)。只要係餐廳門口排隊,就會有職員帶你入座!

3. American Icon Grill 美國愛肯燒烤

有早餐嘅Morning,先至係Good morning嘛!
小編當日試咗呢間餐廳嘅早餐!有好多配料任你揀,可以自己砌個BIG Breakfast~

另外都有唔少已經配搭好嘅早餐Set畀你揀~ 港式、台式、上海菜都有!

最驚喜係有好多好多好多款麵包任揀任食!
食包都夠你食飽喇~~

*注意:所有餐廳大約10am就會落場,冇得再order㗎喇~
*早、午餐有指定開放時間、晚餐就要根據船卡安排好的用餐時間(分別有5:30pm、8:00pm兩個時段)。只要係餐廳門口排隊,就會有職員帶你入座!

4. The Cafe Two70 270咖啡屋

先生小姐,Coffee Or Tea?
長期開放,可以自行選擇三文治、麵包、沙律,仲有湯、咖啡或茶~~

遲咗起身嚟食Brunch?未夠鐘食飯但已經肚餓?
Come On Baby~

叫得270 Cafe梗係唔係浪得虛名,想食住欣賞無敵大海景,嚟呢到實冇介紹錯~

5. Chic 奇客餐廳

最後一晚咁開心,梗係要開返支紅酒飲!
不過要留意,酒係要自費㗎~~

主打西餐,龍蝦湯超驚喜~~ 濃蝦味、夠Creamy!
想飲中湯都無問題,有椰子雞湯揀㗎~

好少主菜會配飯,見到餐牌有蝦仁炒蛋配飯即刻嗌!
啊~ 係茶記嘅味道~~ 超!級!好!食!

最難得係連手拍青瓜都有!


上:(左)忌廉青口配飯、(右)酥皮三文魚配薯蓉
下:(左)白汁烤魚柳意粉、(右)蕃茄蓉配多款素菜

當然唔少得西餐Menu啦!海鮮好新鮮,唔通因為近海?哈哈~~
就連配菜、白汁都好好味,一個人兩份正餐都食得落~


上:(左)香蕉朱古力麵包布丁(配雪糕)、(右)酥皮蛋糕
下:(左)朱古力慕斯(配雪糕)、(右)芒果布丁

食埋甜品就Perfect喇~~
小編好鍾意香蕉朱古力麵包布丁!香蕉味好濃,但又冇搶到朱古力味!

不過最驚喜都係雪糕,估唔到一啲都唔普通。
一致認同想無極Encore~

*最後一晚,所有餐廳職員都會出嚟拎餐巾跳舞,答謝各位客人!
*早、午餐有指定開放時間、晚餐就要根據船卡安排好的用餐時間(分別有5:30pm、8:00pm兩個時段)。只要係餐廳門口排隊,就會有職員帶你入座!

– – – – – – – – – – – – – – – – – – – – – – – –

放假去邊 更多好介紹:
快啲like我哋Facebook
同follow我哋Instagram啦!

*以上資訊只供參考,如有任何變化或更改均以現場情況或商戶決定為準*