中西區一日遊 老字號美食再加文青影相位 | 假日好去處 | 放假去邊

拍拖唔知去邊好？唔洗諗啦！今個星期小編帶大家去中西區一日遊！

有老字號美食、舊式建築、文青去處、影相位，包羅萬有！

跟住呢份行程，陪女神去行街街啦，最重要係帶埋相機幫佢影相呀嘛！

小編：Jaime（IG: @ jaimehomusic）

－－－－－

由中環出發，START! 中西區係香港開埠後最早開發的地區，又係香港嘅商業中心，但而家依然可以搵到好多老字號的海味店、參茸燕窩店和中藥店等。

 

砵典乍街（石板街）

影相位！人稱為石板街嘅砵典乍街，以石塊舖蓋成一凹一凸嘅路，係香港一級歷史建築。小編去嗰日見到有人影婚紗相，證明呢度真係靚景！

地址：中環砵典乍街

 

蘭芳園

去醫肚食個午餐先！由石板街出發，沿住擺花街向前行，就會見到六十年老字號蘭芳園。

推介：招牌絲襪奶茶、金牌熱辣辣豬扒飽 $24、出位撈丁系列$51(奉送咖啡或茶, 凍飲加$2)

小編就叫咗個蔥油雞扒撈丁同凍奶茶！

地址：中環結志街2號

營業時間：7:30am-6pm

 

荷李活道

喺蘭芳園往上行一條街，就到達荷李活道。荷李活道係一條古董街，有各式各樣嘅古物、古董。

舊中區警署

舊中區警署係香港法定古蹟，屬於中區警署建築群之一。而家正進行復修工程，目前不開放參觀。(補充:建築工程於2011年11月展開，預計可於2016年下半年分階段竣工。)

地址：香港中環荷李活道10號

 

「住好啲」特色牆

影相位！呢幅係「住好啲」設計師畫嘅舊式樓宇圖案壁畫，好多人都喺度打卡！喺馬路旁邊影相時，記得注意車輛！

地址：中環荷里活道48號與嘉咸街46號交界旁

 

公利

沿住荷李活道，途經傳統老店公利，可以試下馳名嘅蔗汁、蔗汁糕。

蔗汁糕$14

 

PMQ 元創方

繼續沿住荷李活道，去到鴨巴甸街，就會望到左手邊嘅PMQ元創方。前身係荷李活道已婚警察宿舍，係香港三級歷史建築。經過活化後，2014年起成為創意中心，既係本地藝術家嘅studio，又係店舖。逐間舖睇都有排行㗎！呢度仲有幾間輕食店，想食野可以坐低嘆個tea！

行到攰想坐下嘅話，去4樓平台空中花園啦！空中花園亦係連接兩座A、B主樓嘅通道。

地址：中環鴨巴甸街35號

 

西區公眾貨物裝卸區 (Instagram Pier)

參觀完元創方，行去上環搭電車。喺石塘咀落車，往海邊步行5分鐘，就係西區公眾貨物裝卸區(Instagram Pier)喇！招牌背景有貨櫃、卡板、黃黑色燈柱，相信鍾意用IG嘅你都唔會陌生啦！呢度亦都係個影日落嘅好地方，或者坐下吹下海風。望住海，小編都忍唔住唱「聽～海哭的聲音」！

 

西港城

影完相喺石塘咀乘搭電車返去上環，參觀西港城。西港城原本係舊上環街市，改建後變成傳統行業及手工藝的商場，售賣特色工藝品及懷舊收藏品。

 

海膽屋

如果好似小編咁喺星期日去，周圍好多食肆都閂門，結果就俾小編搵到呢間日式食店！堂食、外賣都得。落單之後即刻整㗎！

推介：芝士鰻魚手卷！鰻魚食落夠冧，同芝士超夾，熱度又夠！

芝士鰻魚手卷$22、三文魚腩手卷$22、波子汽水$18

地址：上環永樂街28-34號東成商業大廈地下A舖

 

放假去邊 更多好介紹:
快啲like我哋Facebook
同follow我哋Instagram啦!

*以上資訊只供參考，如有任何變化或更改均以現場情況或商戶決定為準*