沙田文化一日遊 曾大屋、車公廟 | 假日好去處 | 放假去邊

平時去沙田除左唱K、睇戲之外，仲有咩野做好呢？

不如跟住呢個行程嚟個一日文化遊，慢慢去感受吓傳統建築物，有時間可以去埋文化博物館~

夜晚再去食地道美食：燒乳鴿、Wasabi蟹籽手撕雞！

 

曾大屋

曾大屋係沙田嘅一條客家圍村。原稱山下圍，1848年起興建，1867年建成，係香港一級歷史建築物，公眾可以自由入村參觀。

因為依然有市民居住，所以參觀時記得保持安靜。

創建人曾貫萬，喺廣東省五華縣南下到香港，後來因開設石廠致富，就起圍村俾族人居住。全屋有99個單位。二次大戰時曾經俾逃難人士租住，所以又叫「曾大屋」。

曾大屋採用廣東五華老家嘅建築風格，主要由花崗石、青磚建造，四角都有鑊耳型的三層高角樓，有槍孔同瞭望台。

屋前嘅風水池已經被填平，以前嘅護城河、吊橋亦唔再存在。

圍村正面有三個大門，分別有「安富」門、「尊榮」門、「一貫世居」門。正門門頂石匾刻住「一貫世居」，係由中舉人曾貫萬嘅侄兒曾蘇所寫嘅。

 

曾大屋採用三進式設計，有上、中、下三堂，兩側各連兩排橫屋，稱為「三堂四橫」格局。

廳與廳之間由通道、天井相連。曾貫萬當年獲朝廷封為直奉大夫，所以有「大夫第」木匾、「祥徵萬福」石匾。

中堂係族人嘅議事廳。廳入面掛著曾貫萬、其母親朱氏的遺像、「文魁」木匾，又擺放咗曾貫萬71歲壽辰(1878年)獲贈嘅十二幅木刻壽屏。

再穿過另一天井，就到達上堂，即係供奉曾氏祖先的祠堂。

好多村民都已經移居海外，而家留返喺曾大屋入面住嘅曾氏子孫唔多，反而住咗唔少外姓人。

地址：沙田山下圍

前往方法：港鐵車公廟站/沙田圍站步行可到達

———————————

車公廟

沙田車公廟，係香港二級歷史建築物。喺1890年前已經落成。

廟內紀念嘅車公係南宋嘅將軍車大元帥，南宋末年，宋帝昺及車大元帥避難至香港，並駐守西貢。

 

後來車大元帥病死，人民就建廟供奉。後來民眾請車公坐陣，為沙田消除瘟疫，並興建車公廟。

車公廟主殿內的神壇上，屹立著二十七尺高嘅金色車公像。善信可以敲鼓、順時針輕力轉吓銅製風車，希望轉個好運。

天花板上更建有藻井，有麒麟、鳯凰的雕花圖案。

福祿宮，拜吓五路財神，輕輕摸吓聚寶盆，祈求財源滾滾來。

犯太歲就要喺太歲衣上寫自己個名，將檀香放在香爐。先拜斗姆、值年太歲，再拜自己的太歲，將寫咗名嘅太歲金放在其腳底，俗稱「攝太歲」

最後再向其他太歲拜一拜。年尾回廟再參拜。

車公廟內可以求籤，外面會有人即時幫你解籤。

地址：新界大圍車公廟道

前往方法：港鐵車公廟站/大圍站步行可到達

開放時間：每天上午七時至下午六時

———————————

龍華酒店

龍華酒店係香港僅有嘅園林酒店之一。呢度最出名就係燒乳鴿！

地址：沙田下禾輋村22號

———————————

陳根記

沙田屋邨嘅大牌檔，可以食到古早味香港菜！推介：Wasabi蟹籽手撕雞、椒鹽魷魚、糯米鱔

地址：沙田禾輋邨街市大牌檔3-5號

——————————–

放假去邊 更多好介紹:
快啲like我哋Facebook
同follow我哋Instagram啦!