越夜越好味! 台北十大人氣夜市|台灣|放假去邊

Apr 21, 2017 | Uncategorized

每次嚟到台灣,行「夜市」好似已經係必做嘅事,有平靚正嘅特色小食之餘,又可以玩下射BB槍、撈金魚等小遊戲,最重要係台灣人嗰份濃厚嘅人情味嘛!!
講到「夜市」,網民早前就嚴選咗台北十大最具人氣嘅夜市,你又識得幾多個呢?

1. 士林夜市
最具代表性嘅夜市一定係非士林夜市莫屬啦!
生煎包、雞排、香腸、藥膳排骨、蚵仔煎等美食通通都有,而且CP值好高!!
聽見都好想食!!! 難怪吸引咁多外國觀光客慕名而來啦!

地址:台北市士林區大東路、大南路、文林路、基河路間與週邊
營業時間:星期一至日上午11:00至凌晨2:00
交通:乘搭捷運淡水線至劍潭站1號出口

2. 師大夜市
因為位於台北師範大學旁而命名為師大夜市,係年輕一族必去嘅夜市之一!
除咗有女性服飾,夜市尾端仲會不定期舉辦小型創意市集售賣手作小物~
美食方面亦都不容錯過! 人氣冰火菠蘿油、特製綠色臭豆腐,仲有路邊攤馬來西亞料理,真係好吸引!

地址:台北市大安區龍泉街
營業時間:下午4:00至深夜00:00 (部份店家除外)
交通:乘搭捷運新店線至台電大樓站3號出口,步行5分鐘就到

3. 公館商圈
鄰近台灣第一學府「國立台灣大學」嘅公館商圈可以話係夠曬多元化,美食同服飾就梗係少不免,周邊仲有好多景點㗎!
就好似特色書店、出名PUB、戲院、三級古蹟「自來水園博物館」、寶藏巖國際藝術村等地方~

地址:台北市中正區羅斯福路三段
營業時間:不同時間
交通:乘搭捷運松山新店線至公館站4號出口

4. 饒河街觀光夜市
出曬名多好野食嘅饒河夜市,雖然就唔係好大,但勝在夠集中!
出色嘅台灣地道小吃一致得到好評,仲被德國媒體列為全球18大秘境之一,你就知道佢嘅人氣有幾咁勁!
特別為大家推薦:藥燉排骨、麻辣臭豆腐、胡椒餅、豆花甜品~
食飽之後仲可以去附近嘅「彩虹橋」散下步,欣賞迷人嘅河畔夜景!

地址:台北松山區八德路四段與松河街間且與之平行的饒河街上
營業時間:下午5:00至深夜00:00 (部份店家除外)
交通:乘搭捷運板南線至後山埤站,步行約10分鐘就到




5. 寧夏夜市
有「台北人的胃」之稱嘅寧夏夜市亦都係相當受歡迎嘅美食觀光夜市!
呢度有唔少傳統小食,例如滷肉飯、大腸蚵仔麵線同虱目魚肚湯等……仲有超人氣嘅燒麻糬剉冰、炸芋丸等創意美食
近期更加以「寧夏千歲宴」再次打響寧夏夜市嘅名聲,令你可以食到由當地20間至少50年以上歷史老店出品嘅美食!

地址: 台北市大同區寧夏路 (位於南京西路與民生西路間)
營業時間:下午6:00至深夜00:00
交通:乘搭捷運淡水線至雙連站或中山站嘅1號出口,步行10分鐘就到

6. 通化夜市
通化夜市係上班一族每日都會到嘅夜市,傳統美食如雞蛋糕、特製滷肉飯、古早味米粉湯、鹽水雞都好出名!
沿著別名「家具街」嘅文昌街仲有各種獨特新穎嘅中、西家具任你揀添~

通化夜市(臨江街夜市)
地址:台北市大安區臨江街(通化街至基隆路)
營業時間:晚上6:00至深夜00:00 (部份店家除外)
交通:乘搭捷運淡水信義線至信義安和站

7. 華西街觀光夜市
要數到燭目嘅夜市,就要去艋舺龍山寺附近嘅華西街夜市!
入口以傳統紅色宮燈陪襯,真係好難認唔出喎!
至於美食方面就以野味、山產同海鮮為主
值得一提係,呢度嘅「蛇店」好出名,店家仲會為膽大嘅客人提供蛇血生飲、野味蛇湯同蛇肉串等「蛇料理」,有興趣你都可以挑戰下!

地址:台北市萬華區華西街(位於貴陽街與廣州街間)
營業時間:早上10:00至深夜00:00 (部份店家除外)
交通:乘搭捷運板南線至龍山寺站1號出口,步行約10分鐘就到

8. 南機場夜市
號稱「銅板美食聖地」嘅南機場夜市就最有驚喜! 好多高CP值嘅美食,譬如夜市入口嘅雞肉專賣店,仲有道地炸蚵嗲、炸甜糕、每款都係NT70蚊嘅海鮮熱炒店等!
沿途兩旁仲有好多小食等你去發掘㗎!

地址:台北市中正區中華路2段307巷至315巷間
營業時間:早上5:00至深夜00:00
交通:乘搭捷運藍線至西門站6號出口,再轉乘205、223、604號公車至「廈安里」就到

9. 遼寧夜市
遼寧夜市雖然好細,但係就隱藏咗好多道地小食,而且大部分係30、40年以上嘅老字號!
其中炸、蒸、滷三種特色手法嘅臭豆腐更加係遼寧夜市嘅一大亮點!

地址: 台北市中山區遼寧街 (位於長安東路與朱崙街間)
營業時間:下午6:00至深夜00:00
交通:乘搭捷運松山新店線或文湖線至南京東路站,步行10分鐘就到

10.景美夜市
被封為「台北美食小天地」嘅景美夜市都好熱鬧!
因為交通好方便,所以遊客絡繹不絕~
值得推薦嘅有一串只需要NT15蚊嘅人氣碳烤、地瓜粥小食、同酒釀湯圓甜品專賣店,相信會令你回味無窮!!

地址:台北市文山區景美街(景華街與景美街一帶,鄰近景美國小)
營業時間: 下午6:00至深夜00:00
交通:乘搭捷運新店線至景美站2號出口

===============

放假去邊 更多好介紹:
快啲like我哋Facebook
同follow我哋Instagram啦!

*以上資訊只供參考,如有任何變化或更改均以現場情況或商戶決定為準*