去荷蘭旅遊，唔少人都會選擇到阿姆斯特丹～
除咗為人熟悉嘅贊斯堡風車村Zaanse Schans之外，
小鎮贊丹Zaandam亦係一個好值得花時間遊覽嘅地方！
贊丹喺1974年前仲係一個獨立嘅城市，
但之後就被列入為荷蘭贊斯塔德市Zaanstad旗下嘅一個小鎮！
一踏出贊丹火車站，兩邊都係顏色鮮艷嘅建築物！
好似進入咗童話世界之中！
其中贊丹市政廳Stadhuis Zaanstad更加係遊客必到嘅景點！
建築師 Sjoerd Soeters 加入當地元素去設計～
綠底、白框，仲有橙色屋頂，充滿活力！
除此之外，鎮內嘅積木飯店Inntel Hotel亦係吸引遊客嚟小鎮嘅主要原因之一！
呢間酒店以當地傳統木製房屋埋疊出而成～
仲用咗當地代表嘅顏色—綠色，所以特別搶眼！
唔少人都鍾意坐喺酒店室外酒吧一邊曬太陽/飲酒，一邊欣賞荷蘭嘅景色～
好寫意啊！
有時間嘅話，你亦不妨喺小鎮上漫無目的咁散步～～
處處都會發現驚喜㗎！
沿途仲會經過購物中心同餐廳，相當熱鬧！
無論係住宅區定係周邊街道，小鎮上幾乎都係同一種風格嘅建築設計～
下次嚟阿姆斯特丹，一於嚟贊丹Zaandam，感受小鎮簡單純樸嘅生活啦！
贊丹(Zaandam)
地址：Zaandam, North Holland, Netherlands
===============